ضلعی انتظامیہ اور محکمہ انہار کی چشم پوشی،شہباز شریف رنگ روڈ پر محکمہ انہار کی جگہ پر کمرشل دوکانوں کی تعمیر

بورے والا(چوہدری اصغر علی جاوید سے)ضلعی انتظامیہ اور محکمہ انہار کی چشم پوشی،شہباز شریف رنگ روڈ پر محکمہ انہار کی جگہ پر کمرشل دوکانوں کی تعمیر،رہائشی مکان سے ملحقہ محکمہ انہار کی قیمتی اراضی ساتھ شامل کر کے کمرشل دوکانوں کی غیر قانونی تعمیر پر محکمہ مال،محکمہ انہار اور میونسپل کمیٹی نے بھی چپ سادھ لی،سڑک کی تعمیر کے وقت تجاوزات کی زد میں آنے والی بااثر شخصیات کی دوکانیں نہ گرائی جا سکیں،مقامی شہری کی درخواست پر نیب نے تحقیقات کا آغاز کر دیا،تفصیلات کے مطابق بورے والا کے مقامی شہری بشارت علی نے نیب اور دیگر اداروں کے سربراہان کو دی گئی تحریری درخواست میں الزام عائد کیا کہ شہر کے وسط سے گزرنے والی نہر کے دونوں جانب کروڑوں روپے کی لاگت سے بنائی گئی شہباز شریف منی بائی پاس روڈ کی تعمیر سے قبل دونوں جانب محکمہ انہار کی قیمتی کمرشل اراضی پر ناجائز قابضین کے خلاف کاروائی کیلئے محکمہ انہار نے محکمہ مال کی مدد سے اپنی جگہ کا تعین کرکے نہر کے دونوں جانب نشانات لگا کر سرکاری جگہ کی نشاندہی کر دی تھی لیکن سرکاری قیمتی اراضی پر دونوں جانب جگہ واگزار کروانے کیلئے کیے گئے آپریشن کے دوران بعض بااثر شخصیات کی تجاوزات میں آنے والی کمرشل دوکانوں کو صرف نظر کرکے امتیازی آپریشن کیا گیا جس میں غریب اور عام آدمی کی رہائش گاہیں و دوکانیں مسمار کر دی گئی تھیں لیکن مسجد غلامان مصطفےٰ وہاڑی بازار کی شرقی جانب محکمہ انہار کی جگہ پر مقامی بااثر شخص اللہ دتہ اور دیگر شخصیات کی جانب سے رہائش سے ملحقہ سرکاری جگہ پر تعمیر کی گئیں غیر قانونی کمرشل دوکانوں کو گرانے کی بجائے ضلعی انتظامیہ اور محکمہ انہار نے مکمل چشم پوشی اختیار کر لی جس کی شکایت ڈی سی وہاڑی علی اکبر بھٹی کو بھی کی گئی لیکن انہوں نے اسکا کوئی نوٹس نہیں لیا یہ دوکانیں میونسپل کمیٹی سے نقشہ منظور کروائے بغیر تعمیر کی گئی تھیں اسکے علاوہ بھی محکمہ انہار نے ڈی سی وہاڑی کے دباﺅ میں آ کر محکمہ انہار کی سرکاری جگہ پر تعمیر شدہ دیگر بااثر شخصیات کی کمرشل دوکانوں کو گرانے کی بجائے چشم پوشی کی وجہ سے ناصرف سرکاری اراضی پر بااثر افراد قابضین ہو چکے ہیں بلکہ ایک ہی سڑک کو سال میں دو تین مرتبہ بنانے کے منصوبوں میں حکومت کے کروڑوں روپے ضائع کیے جا چکے ہیں اُس نے چیف سیکرٹری پنجاب اور نیب حکام سے مطالبہ کیا ہے کہ ڈپٹی کمشنر وہاڑی کو فوی طور پر عہدہ سے ہٹا کر سرکاری اراضی پر بننے والی کمرشل دوکانوں کی تعمیر اور سڑکوں کی تعمیر میں ہونے والی مبینہ کرپشن و لوٹ مار کی اعلیٰ سطحی تحقیقات کی جائیں اس حوالہ سے جب ڈی سی وہاڑی علی اکبر بھٹی سے رابطہ کیا گیا تو انہوں نے بتایا کہ بشارت علی نامی شخص نے وہاڑی بازار میں مسجد سے ملحقہ محکمہ انہار کی جگہ پر عرصہ دراز سے قبضہ کرکے دوکانیں تعمیر کر رکھی تھیں جن کو سڑک کی تعمیر سے قبل مسمار کرکے جگہ وگزار کروائی تھی اس بات کا اُسے رنج ہے جس کی وجہ سے وہ بے بنیاد الزامات عائد کر رہا ہے جن میں کوئی صداقت نہیں۔