اربوں روپے کے ترقیاتی منصوبے ناقص اور غیر معیاری میٹریل کے استعمال سے کرپشن کی نظر ہو گئے
بورے والا(آفتاب نذیر سے)حکومت کے پانچ سالہ دور میں اربوں روپے کے ترقیاتی منصوبے ناقص اور غیر معیاری میٹریل کے استعمال سے کرپشن کی نظر ہو گئے،محکمہ ہائی وے،بلڈنگ اور لوکل گورنمنٹ کی نگرانی میں مکمل ہونے والے منصوبوں میں سرکاری اہلکاروں اور ٹھیکیدار مافیا کی لوٹ مار کے تمام سابقہ ریکارڈ ٹوٹ گئے،اکثر منصوبے تکمیل کے چند ماہ بعد ہی ٹوٹ پھوٹ کا شکار،محکموں کے سربراہان اور ضلعی انتظامیہ کی مکمل چشم پوشی،بعض منصوبوں کی انکوائری رپورٹس میں ناقص و غیر معیاری میٹریل استعمال ہونے کی تصدیق کے باوجود ذمہ دار حکام نے آنکھیں بند کر لیں،نیب سے اعلیٰ سطحی تحقیقات کا مطالبہ،تفصیلات کے مطابق مسلم لیگ(ن) کے 5سالہ دور حکومت میں بورے والا سمیت ضلع بھر میں نئی سڑکوں کی تعمیر،شہباز شریف منی بائی پاس،نکاسی آب کے میگا پراجیکٹس،سولنگ،ٹف ٹائلز،نئی سرکاری بلڈنگز اور تعلیمی اداروں میں نئے کلاس رومز،تفریحی پارک،ہسپتال کی اپ گریڈیشن،ریویمپنگ اور دیگر ترقیاتی کاموں میں اربوں روپے کی خطیر رقم تو خرچ ہو گئی لیکن ان منصوبوں میں متعلقہ محکموں ہائی وے،بلڈنگز،لوکل گورنمنٹ اور دیگر ترقیاتی اداروں کے انجنیئرز اور دیگر حکام کے ٹھیکیدار مافیا سے کمیشن کے سلسلہ میں ہونے والے مبینہ گٹھ جوڑ نے خادم اعلیٰ پنجاب کے شفافیت اور کرپشن سے پاک ویژن کا خواب چکنا چور کر دیا ان منصوبوں میں کھلے عام غیر معیاری اور ناقص میٹریل کے استعمال سے قوم کا پیسہ مٹی اور پانی میں دفن کر دیا گیا شہباز شریف منی بائی پاس کے منصوبے پر پہلے مرحلہ میں 35کروڑ سے زائد کی خطیر رقم جاری ہوئی جس کے ٹھیکیدار کو بااثر سیاسی شخصیات اور صوبائی سطح کے اہم افسران کی آشیرباد ہونے کی وجہ سے اس منصوبے میں انتہائی غیر معیاری اور ناقص میٹریل کے علاوہ منظور شدہ اسٹیمیٹ کے برعکس کام مکمل کرکے کروڑوں روپے وصول کر لیئے گئے جس کی دو مختلف محکموں نے انکوائری کے بعد ناقص و غیر معیاری میٹریل استعمال ہونے کی تصدیق بھی کی لیکن صوبائی اور ضلعی سطح پر ذمہ دار افسران نے کوئی کاروائی نہیں کی جبکہ 35کروڑ سے زائد کی لاگت سے این اے167 میں مکمل ہونے والا نکاسی آب کا منصوبہ بھی سیاسی ٹھیکیدار اور محکمہ پبلک ہیلتھ کے افسران کی مبینہ ملی بھگت سے کرپشن کا ایک بڑا سکینڈل بن چکا ہے اسکے علاوہ دیگر کروڑوں روپے کے ترقیاتی منصوبوں میں بہنے والی کرپشن کی گنگا میں کئی سرکاری اہلکاروں اور ٹھیکیداروں نے بھی ہاتھ دھو لیئے ہیں ترقیاتی منصوبوں میں ہونے والی اس وسیع پیمانے پر کرپشن پر شہریوں نے نیب سے تحقیقات کا مطالبہ کیا ہے۔
About Author
