ترقیاتی کاموں کی آڑ میں کمیشن مافیا ملکی خزانے کو دونوں ہاتھوں سے لوٹ رہے ہیں۔غلام مصطفےٰ ریاض

بورے والا(چوہدری اصغر علی جاوید سے)پنجاب ٹیچرز یونین کے مرکزی صدر رائے غلام مصطفی ریاض اور سیکرٹری نشر و اشاعت مرزا طارق محمود نے کہا ہے کہ موجودہ حکومت کی ناقص معاشی پالیسیوں کی وجہ سے افراطِ زر پیدا کرنے اور آئی ایم ایف،عالمی بنک سے مشروط قرض لینے کی وجہ سے ملک میں مہنگائی کی شرح سو فیصد بڑھ گئی ہے جس کی وجہ سے ملازمین اور عام آدمی کی زندگی اجیرن ہو گئی ہے،بڑھئی قیامت خیز مہنگائی کی وجہ سے اساتذہ و ملازمین اپنے بچوں کو بنیادی سہولیات اور دو وقت کی روٹی دینے سے قاصر ہیں،حکمران اور بیورو کریسی خود تو عیاشیوں میں مصروف ہیں اور ترقیاتی کاموں کی آڑ میں کمیشن مافیا ملکی خزانے کو دونوں ہاتھوں سے لوٹ رہے ہیں جبکہ عام آدمی اور ملازمین بڑھتی ہوئی مہنگائی اور بھوک کے ہاتھوں مجبور ہو کر اپنے بچوں کے انسانی اعضاء بیچنے اور خود کشیوں پر مجبور ہیں جو حکومت کے لیے لمحہ فکریہ ہے انہوں نے حکومت پاکستان،وزیر اعظم پاکستان،سیکرٹری خزانہ و وزیر خزانہ سے مطالبہ کیا ہے کہ آئندہ آنے والے بجٹ میں اساتذہ و ملازمین کی تنخواہوں اور پنشن میں مہنگائی کے تناسب سے سو فیصد اضافہ کیا جائے اور میڈیکل الاﺅنس،ہاﺅس رینٹ میں موجودہ سکیلوں کے مطابق اضافہ کیا جائے وفاقی اساتذہ اور صوبائی اساتذہ کے سکیلوں میں تفاوت ختم کی جائے انہوں نے مزید کہا کہ ہم ایپکا کے چارٹر آف ڈیمانڈ کی بھرپور تائید کرتے ہیں۔