ٹی ایس او کی عدم دلچسپی اور ڈیوٹی سے اکثر غائب ہونے سے قائد اعظم سٹیڈیم کی حالت قابل افسوس ہو گئی

بورے والا(چوہدری اصغر علی جاوید سے)تحصیل سپورٹس آفیسر کی عدم دلچسپی اور ڈیوٹی سے اکثر غائب ہونے سے قائد اعظم سٹیڈیم کی حالت قابل افسوس ہو گئی،گراﺅنڈ جڑی بوٹیوں سے بھر گئے،دیواریں ٹوٹنے سے سٹیڈیم نشیﺅں کی آماجگاہ بن گیا،تحصیل سپورٹس کمیٹی کے اجلاس میں غیر معمولی تاخیر سے کھلاڑیوں کے مسائل میں روز بروز اضافہ،کھلاڑیوں اور سپورٹس تنظیموں کا احتجاج،تفصیلات کے مطابق تحصیل سپورٹس آفیسر بورے والا محمد جمیل کی سٹیڈیم،کھلاڑیوں اور کھیلوں سے عدم دلچسپی اور ڈیوٹی سے اکثر غائب رہنے سے سٹیڈیم کے گراﺅنڈز میں جڑی بوٹیوں کی بہتات اور عدم دیکھ بھال نے کھیلوں کے میدان ویران کر دئیے ہیں سٹیڈیم کی عقبی دیوار نہر کی جانب سے عرصہ دراز سے ٹوٹ چکی ہے جہاں سے نشے کے عادی افراد داخل ہو کر گراﺅنڈ میں بیٹھ کر نشہ کرتے نظر آتے ہیں کروڑوں کی لاگت سے بننے والے جمنیزیم کے مطلوبہ نتائج برآمد نہیں ہو رہے سٹیڈیم کے عملہ میں کمی کی وجہ سے ڈیلی ویجز ملازمین نے بھی ہاتھ کھڑے کر دئیے ہیں سٹیڈیم کی دیکھ بھال،کھلاڑیوں کے مسائل کے حل اور کھیلوں کی ترویج کے لیے قائم تحصیل سپورٹس کمیٹی کے اجلاس میں غیر معمولی تاخیر سے بہت سے مسائل نے سر اٹھا لیا ہے کھلاڑیوں اور سپورٹس تنظیموں کی جانب سے گراﺅنڈ اور کھلاڑیوں کے مسائل کے حل پر توجہ دینے کی بار بار درخواست کے باوجود تحصیل سپورٹس آفیسر نے چشم پوشی اختیار کر رکھی ہے مقامی سپورٹس تنظیموں نے ڈی سی وہاڑی اور اسسٹنٹ کمشنر بورے والا سے اصلاح احوال کا مطالبہ کیا ہے۔