شہریوں کو صحت مند تفریح کے ذریعہ ذہنی آسودگی فراہم کرنا وقت کی اہم ضرورت ہے۔رانا عامر کریم

بورے والا(چوہدری اصغر علی جاوید سے)وزیر اعلیٰ پنجاب کے پرسنل سٹاف آفیسر رانا عامر کریم خاں نے کہا ہے کہ شہریوں کو صحت مند تفریح کے ذریعہ ذہنی آسودگی فراہم کرنا وقت کی اہم ضرورت ہے،پنجاب حکومت نے ہمیشہ اُن اداروں کی حوصلہ افزائی کی ہے جو عوام کو اس گھٹن کے ماحول میں صحت مند تفریح کے مواقع فراہم کرتے ہیں،عوام کو بنیادی سہولتوں کی فراہمی کے ساتھ ساتھ مفت اور معیاری تفریح کی فراہمی حکومت کی اولین ترجیح رہی ہے،خادم اعلیٰ پنجاب کا ویژن ہے کہ عوام کے لیے ہر سطح پر اور ہر شعبہ میں آسانیاں پیدا کرکے اُنکا احساس محرومی ختم کیا جا سکے،پھول ہمارے ذہنوں اور ماحول کو تازگی بخشتے ہیں اور پھولوں سے پیار کر کے ہم اپنے معاشرتی رویوں میں تبدیلی لا سکتے ہیں،ان خیالات کا اظہار انہوں نے میونسپل کمیٹی بورے والا کے زیر اہتمام قائد اعظم سٹیڈیم میں منعقدہ سالانہ تین روز فلاور شو کی اختتامی تقریب سے خطاب کرتے ہوئے کیا تقریب سے چیئرمین ضلع کونسل ساہیوال چوہدری زاہد اقبال،چیئرمین بلدیہ وہاڑی غلام مرتضیٰ ڈوگر،چیئرمین بلدیہ بورے والا چوہدری محمد عاشق آرائیں اور وائس چیئرمین حاجی محمد افتخار بھٹی نے بھی خطاب کیا اس موقع ہر معروف سماجی شخصیت رانا طاہر کریم، چیف آفیسر ضلع کونسل وہاڑی میاں محمد اظہر،چیئرمین ضلع کونسل وہاڑی پیر غلام محیی الدین چشتی کے صاحبزادے چیئرمین یوسی پیر مطیب چشتی،چیف انجنیئر ضلع کونسل وہاڑی ملک منظور احمد،چیف آفیسر بلدیہ بورے والا راﺅ محمد علی،وائس چیئرمین رانا شاہد سرور،امیدوار صوبائی اسمبلی سردار خالد محمود ڈوگر،کونسلر بلدیہ میاں خالد حسین،چوہدری عمران غفور،سردار ظہور احمد ڈوگر،رانا شاہد سرور اور دیگر نمائندہ سیاسی و سماجی شخصیات بھی موجود تھیں تقریب کے اختتام پر اول،دوم اور سوم آنے والے سٹالز میں ٹرافیاں اور پھول تقسیم کیے گئے تعلیمی اداروں میں اول پوزیشن پنجاب کالج نے حاصل کرکے اپنا اعزاز برقرار رکھا۔