غیر قانونی منی پیٹرول پمپ پر خوفناک آتشزدگی،آگ نے ملحقہ چار گھروں اور دوکانوں کی بھی لپیٹ میں لے لیا
بورے والا(چوہدری اصغر علی جاوید سے)غیر قانونی منی پیٹرول پمپ پر خوفناک آتشزدگی،آگ نے ملحقہ چار گھروں اور دوکانوں کی بھی لپیٹ میں لے لیا،آگ بجھانے کے لیے ملحقہ شہروں سے بھی فائر برگیڈ کی گاڑیاں طلب کرنا پڑیں،آگ کی لپیٹ میں آکر دو بچوں اور ایک خاتون سمیت پانچ افراد جھلس گئے،بھگڈر مچنے سے خاتون اور ایک نوجوان ٹریکٹر ٹرالی کی زد میں آکر شدید زخمی، ڈپٹی کمشنر وہاڑی نے علاقہ میں گیس کی سپلائی فوری بند کروا دی،اسسٹنٹ کمشنر نے امدادی کاروائیوں کی نگرانی کی،دو گھنٹے کی جدوجہد کے بعد آگ پر قابو پا لیا گیا،تفصیلات کے مطابق معصوم شاہ روڈ پر واقع ایک گھر کے باہر دوکان میں پرویز نواز ملک نامی شخص نے محکمہ سول ڈیفنس کی مبینہ ملی بھگت سے غیر قانونی منی پیٹرول پمپ لگایا ہوا تھا کہ آج مغرب کے بعد اُسکے گھر میں پڑے پیٹرول سے بھرے کین میں آگ لگ گئی جس نے منی پیٹرول پمپ اور پورے گھر کو اپنی لپیٹ میں لے لیا جبکہ آگ اتنی تیزی سے بڑھی کہ فائر برگیڈ کے آنے سے قبل ہی اُس نے ملحقہ دوکانوں اور گھروں کو بھی اپنی لپیٹ میں لے لیا آگے شعلے بلند ہوتے دیکھ کر سینکڑوں افراد امدادی کاروائیوں کے لیے آن پہنچے آگ کی لپیٹ میں آکر منی پیٹرول پمپ کا مالک پرویز نواز، 7سالہ بچی مبین،اُسکی والدہ رضیہ بی بی،2سالہ معصوم بچہ احمد اور 35سالہ عبدالرزاق بری طرح جھلس گئے جنہیں فوری طور پر تحصیل ہیڈ کوارٹر ہسپتال بورے والا منتقل کر دیا گیا جبکہ اسی دوران گھروں میں بھگڈر مچنے سے دوڑ کر سڑک کی جانب آنے والی خاتون شہباز بی بی اور محمد حسین نامی شخص ٹریکٹر ٹرالی سے ٹکرا کر شدید زخمی ہو گئے زخمیوں میں 2سالہ بچے کی حالت نازک بیان کی جاتی ہے اس واقعہ کی اطلاع ملتے ہی اسسٹنٹ کمشنر بورے والا راﺅ تسلیم اختر،معروف سماجی شخصیت شیخ شہزاد مبین،چیئرمین بلدیہ چوہدری محمد عاشق آرائیں،وائس چیئرمین بلدیہ حاجی محمد افتخار بھٹی اور طاہر مجید ملک بھی موقع پر پہنچ گئے فائر برگیڈ اور ریسکیو 1122کے عملہ نے امدادی کاروائیاں شروع کیں لیکن آگ زیادہ پھیل گئی جس پر ڈی سی وہاڑی نے محکمہ سوئی گیس کو ہدایت کرکے گیس کی سپلائی بند کروا دی اور ملحقہ شہروں سے فائر برگیڈ بھی طلب کر لی فائر برگیڈ نے دو گھنٹے کی کوشش کے بعد آگ پر قابو پا لیا ڈی سی وہاڑی بھی موقع پر پہنچ گئے اور آگ کی لپیٹ میں آکر جلنے والے گھروں کے نقصانات کا تخمینہ لگانے کی ہدایت کر دی بعدازاں انہوں نے ہسپتال میں زخمیوں کی عیادت کی۔
About Author
