ڈی سی آفس وہاڑی کے کلرک نے جعلسازی کے ذریعہ مقامی شہری کو 14لاکھ روپے سے محروم کر دیا

بورے والا(چوہدری اصغر علی جاوید سے)ڈی سی آفس وہاڑی کے کلرک اور اسٹام فروشوں نے جعلسازی کے ذریعہ مبینہ ملی بھگت کر کے مقامی شہری کو سستی اراضی دلوانے کا جھانسہ دیکر 14لاکھ روپے سے محروم کر دیا،اسسٹنٹ ڈائریکٹر ملتان آصف نور نے متاثرہ شخص کی درخواست پر الزام علیہان کو طلب کر کے تحقیقات شروع کر دی،تفصیلات کے مطابق قصبہ کوٹ سادات کے رہائشی سید علیم احمد شاہ نے ایف آئی اے اور ڈپٹی کمشنر وہاڑی چیئرمین انٹی کرپشن ضلع وہاڑی کو تحریری درخواست میں بتایا کہ ڈی سی آفس کے کالونی کلرک محمد شہباز کھوکھر سے اس کے دوستانہ مراسم ہیں شہباز کھوکھر نے ستمبر2016 میں مجھے کہا کہ چک 525ای بی تحصیل بورے والا میں جہلم سکیم کے تحت راجہ رحمت علی ولد غلام محمد مرحوم کو 100کنال رقبہ الاٹ ہوا ہے جس کے بیع نامہ کی تکمیل ہونا باقی ہے رحمت علی مرحوم کے وارثان راجہ اعجاز احمد،راجہ ریاض احمد،راجہ سجاد احمد کیانی،نورین شاہد دختر رحمت علی،فیاض اختر دختر رحمت علی،شمیم اختر زوجہ محمد اکبر پرویز سکنہ ہائے کچہری روڈ جہلم بورے والا وہاڑی نہیں آ سکتے بلکہ زمین کو فروخت کرنا چاہتے ہیں آپ کا سستا سودا کروا دیتا ہوں بعد میں بھاری منافع کے عوض فروخت کر لیں گے کلرک مذکور شہباز کھوکھر اپنے دو ساتھی اشٹام فروشوں فیاض حسین اور حسنین احمد اشٹام فروش ضلع کچہری وہاڑی کے ہمراہ 10ستمبر 2016کو مجھے جہلم لے گیا چونکہ ان کے ورثاء سے پہلے ہی فون پر معاملات طے تھے وہاں جا کر 84لاکھ روپے میں سودا طے کر کے اشٹام لکھ کر مجھ سے 12لاکھ روپے وصول کر لیے گئے جبکہ بقیہ رقم کے چیک بھی وصول کر لیے گئے اور کہا کہ تمام ادائیگی کے بعد ڈی سی آفس وہاڑی سے بیع نامہ تیار کروا کر رقبہ سائل کے نام منتقل کروا دیا جائے گا واپس آ کر گروہ کے ارکان بیع نامہ تیار کروانے میں لیت و لعل کرتے رہے میرے اصرار پر کلرک موصوف نے کہا کہ اس کی ڈی سی وہاڑی سے بات ہو چکی ہے جنہیں 2لاکھ روپے دینا پڑیں گے میں نے 2لاکھ ادا کر دیئے ہیں اب انکاری ہو چکے ہیں جعلسازوں کے گروہ نے مجھے مبینہ ملی بھگت کر کے نہ زمین دی ہے بلکہ سبز باغ دکھا کر لاکھوں روپے سے بھی محروم کر دیا ہے سید علیم شاہ نے ایف آئی اے اور ڈی سی وہاڑی سے مطالبہ کیا ہے کہ جعلسازوں کے گروہ کے سرغنہ کالونی کلرک شہباز کھوکھر اور اس کے ساتھیوں کے خلاف مقدمہ درج کر کے کاروائی کی جائے علاوہ ازیں ڈپٹی کمشنر وہاڑی کے نام پر 2لاکھ روپے رشوت وصول کرنے کے سلسلہ میں بھی انضباطی کاروائی کر کے مجھے انصاف فراہم کیا جائے اسسٹنٹ ڈائریکٹر ایف آئی اے ملتان نے الزام علیہان کو 31مارچ کو تحقیقات کیلئے طلب کر لیا ہے۔