منچلے نوجوانوں کا الائیڈ سکول کے سامنے شراب کے نشے میں غل غپاڑہ اور ہوائی فائرنگ

بورے والا(چوہدری اصغر علی جاوید سے)سات گاڑیوں پر سوار سالگرہ پارٹی منانے کیلئے جانے والے منچلے نوجوانوں کا الائیڈ سکول بورے والا کے سامنے شراب کے نشے میں غل غپاڑہ اور ہوائی فائرنگ،فائرنگ سے الائیڈ سکول کا سیکورٹی گارڈ شدید زخمی،ہسپتال منتقل،پولیس کی بھاری نفری نے گھیرا ڈال کر3گاڑیوں میں سوار 15ملزمان کو گاڑیوں سمیت گرفتار کر کے حوالات میں بند کر دیا،دیگر بااثر ملزمان پولیس کو چکمہ دے کر گاڑیوں سمیت فرار،تفصیلات کے مطابق تھانہ صدر کے علاقہ 443ای بی بنگلہ کے رہائشی مبشر عرف بلی خان کی سالگرہ کی تقریب تھی کہ اس نے شہر بھر سے کئی بااثررئیس زادوں کو بھی مدعو کیا ہوا تھا جنہوں نے سالگرہ کا کیک کاٹنے سے پہلے گاڑیوں کے قافلے کی صورت میں بنگلہ سے شہر کا رخ کر لیا اور شراب کے نشے میں دھت کئی منچلے ہوائی فائرنگ کرتے جا رہے تھے کہ اسی اثناءمیں نہر کی دوسری جانب تھانہ سٹی کی حدود میں واقع الائیڈ سکول کا سیکورٹی گارڈ محمد اشرف جو کہ اپنی ڈیوٹی پر موجود تھا ان کی فائرنگ کی زد میں آ کر شدید زخمی ہو گیا جسے فور ی طور پر تحصیل ہیڈ کوارٹر ہسپتال بورے والا منتقل کر دیا گیا اور سکول انتظامیہ نے اس واقعہ کی اطلاع فوری طور 15 پر کر دی اور سکول کے ملازموں نے گاڑیوں میں فرار ہونے والے ان منچلوں کا تعاقب شروع کر دیا جو غل غپاڑہ کرتے ہوئے شہر کا چکر کاٹ کر شہر کے بارونق عارف بازار میں پہنچے تو ان کے تعاقب میں پولیس اور لیڈ فورس کے جوانوں نے تمام ملزمان کو حراست میں لے لیا جبکہ کچھ منچلے اپنی گاڑیوں سمیت فرار ہونے میں کامیاب ہو گئے ڈی ایس پی بورے والا ملک طاہر مجید کی ہدایت پر سرکل بورے والا کی پولیس کی بھاری نفری بھی موقع پر پہنچ گئی حراست میں لیے گئے ملزمان ارسلان صفدر کھوکھر،محمد آصف سکنہ مجاہد کالونی،عامر صفدر کھوکھر سکنہ پی بلاک،عادل مصطفےٰ سکنہ 169-9ایل چیچہ وطنی،اویس سعید،شاہد علی پٹھان سکنہ 443ای بی،رانا امان سکنہ ایم بلاک،محمد علی علوی سکنہ این بلاک،احسن علی آرائیں،محمد شاہد آرائیں سکنہ ہائے ایچ بلاک، عمر فاروق بھٹی،عامر جاوید اعوان،مبشر پٹھان،ابدال عرف مانا جٹ سکنہ گلشن رحمان،علی رضا کھوکھر،بلال ارشاد آرائیں سکنہ فیض کالونی،محمد اسد جٹ سکنہ 435ای بی اور ان کے زیر استعمال تین گاڑیاں کار نمبر 5438ایل ای بی سوزوکی،ڈبل کیبن ڈالہ نمبری8387ایل اور سوزوکی کاربلا نمبری قبضہ میں لے کر زیر دفعہ 149،148،337- 2،324ایچ ت پ مقدمہ درج کر کے تفتیش شروع کر دی ہے دریں اثناء تھانہ سٹی پولیس نے مجاہد کالونی میں مہندی کی تقریب میں آتش بازی کرتے ہوئے چار نوجوانوں ایاز سہیل،بلال آرائیں،شاہد راﺅ اور منظور احمد سکنہ مجاہد کالونی کو گرفتار کر کے زیر دفعہ 286،285ت پ مقدمہ درج کر لیا ہے ذرائع سے معلوم ہوا ہے کہ وقوعہ میں گرفتار ملزمان حوالات میں بھی اپنی سالگرہ کے حوالے سے موج مستیاں کرتے رہے بورے والا شہر کے نمائندہ افراد نے سالگرہ،مہندی اور بارات کے پروگراموں میں فائرنگ اور آتش بازی کے بڑھتے ہوئے واقعات پر گہری تشویش کا اظہار کیا ہے۔