فلیکس اتارنے پر کرسچین کالونی میں دو مسیحی متحارب گروپوں میں تصادم،9 افراد زخمی

بورے والا(چوہدری اصغر علی جاوید سے)فلیکس اتارنے پر کرسچین کالونی میں دو مسیحی متحارب گروپوں میں تصادم،فریقین کے 9افراد زخمی پولیس موقع پر پہنچ گئی،زخمیوں کو طبی امداد کے لیے تحصیل ہیڈ کوارٹر ہسپتال منتقل کر دیا گیا،تفصیلات کے مطابق کرسچین کالونی میں واقع چرچ کے سامنے دیوار پر کئی ماہ قبل عامر مسیح،جما مسیح وغیرہ نے کرسمس مبارک کی پینا فلیکس لگائی ہو ئی تھی اور اس پر میونسپل کمیٹی لیبر یونین کے عہدیدار محمد شریف کی تصویر بھی لگی ہوئی تھی گزشتہ اتوار کے روز مختار مسیح،اشفاق مسیح،یعقوب مسیح،شوکت مسیح،خالد مسیح، مشتاق مسیح وغیرہ نے اسے پھاڑ دیا جس سے فریقین میں جھگڑا ہو گیا جو طول پکڑ گیا اور بات اینٹوں،سوٹوں اور ڈنڈوں تک پہنچ گئی جس سے دونوں گروپوں کے افراد شدید زخمی ہو گئے وقوعہ کی اطلاع پر پولیس موقع پر پہنچ گئی ایک گروپ نے موقع پر ہوائی فائرنگ بھی کی جس سے خوف و ہراس پھیل گیا مشتعل مظاہرین نے بورا چیچہ وطنی روڈ پر ٹائر جلا کر اپنے مطالبات کے حق میں مظاہرہ بھی کیا پولیس زخمیوں کو طبی امداد اور میڈیکل سرٹیفکیٹ حاصل کرنے کے لیے تحصیل ہیڈ کوارٹر ہسپتال لے گئی اور وقوعہ بارے مصروف تفتیش ہے جما مسیح گروپ نے الزام عائد کیا کہ دوسرے مسیحی گروپ کو کونسلر شمعون مسیح،اصغر اور کالی وغیرہ کی حمایت حاصل ہے جو آبادی میں پولیس سے ساز باز ہو کر سرعام منشیات فروشی کا دھندہ کرتے ہیں جن کو منع کرنے پر انہوں نے ایک ڈرامہ رچا کر شہر میں مسلم مسیح فساد کھڑا کرنے کی کوشش کی ہے جبکہ مختار مسیح گروپ نے کہا کہ جما مسیح گروپ کے حمایتیوں نے چرچ میں داخل ہو کر پادری کی بے حرمتی کی ہے اور وہ قبروں کی جگہ پر قبضہ کرنا چاہتے ہیں جسے منع کرنے پر یہ واقعہ رونما ہو گیا ہے پولیس نے موقع سے محمد شریف اور اس کے 2بیٹوں کو پوچھ گچھ کے لیے حراست میں لے لیا ہے۔