والدین سے معمولی ناراضگی پر دلبرداشتہ طالبعلم نے سکول میں جا کر پٹرول چھڑک کر آگ لگا لی
بورے والا(چوہدری اصغر علی جاوید سے)والدین سے معمولی ناراضگی پر دلبرداشتہ طالبعلم نے سکول میں جا کر پٹرول چھڑک کر آگ لگا لی،اساتذہ نے فوری طور پر چادر سے ڈھانپ کر آگ بجھائی ،طالبعلم تشویشناک حالت میں نشتر ہسپتال ملتان منتقل،تفصیلات کے مطابق گورنمنٹ بوائز ہائی سکول 327ای بی میں دسویں کلاس کے طالبعلم محمد احسان ولد محمد رفیق انصاری گھر سے سکول پہنچا ابھی سکول لگنے میں 15منٹ باقی تھے کہ اس نے سکول ٹیچر جو ابھی سکول پہنچ رہے تھے ایک ٹیچر کا ہیلمٹ کمرے میں رکھنے کے لیے سکول کے لائبریری روم میں گیا جہاں اس نے اپنے اوپر پٹرول چھڑک کر خود کو آگ لگا لی آگ لگی دیکھ کر ساتھی بچوں نے شور مچایا تو سکول کے ہیڈ ماسٹر محمد رمضان نے فوری طور پر وہاں جا کر آگ میں لپٹے طالب علم پر اپنی چادر ڈال کر آگ بجھائی اور اسے زخمی حالت میں تحصیل ہیڈ کوارٹر ہسپتال پہنچایا جہاں ڈاکٹرز نے ابتدائی طبی امداد کے بعد اسے تشویشناک حالت میں برن یونٹ نشتر ہسپتال ملتان منتقل کر دیا اس واقعہ کی اطلاع ملتے ہی چیف ایگزیکٹو تعلیم شوکت علی طاہر اور دیگر حکام بھی فوری طور پر ہسپتال پہنچ گئے اور اپنی نگرانی میں طالب علم کو ملتان منتقل کروایا سی او تعلیم شوکت علی طاہر نے بتایا کہ معلوم ہوا ہے کہ طالب علم محمد احسان کا رات کو گھر میں والدین سے معمولی جھگڑا ہوا جس پر اس نے سکول آتے ہی یہ انتہائی قدم اٹھایا اور وہ پیٹرول بھی اپنے ساتھ ہی لایا تھا تاہم ہماری خوش قسمتی ہے کہ اساتذہ نے بروقت طالبعلم کو لگی آگ کو بجھا کر اس کی جان بچالی طالبعلم احسان سکول کا ذہین ترین طالبعلم ہے اور نہم کلاس میں اچھے نمبروں کی وجہ سے وہ وظیفہ بھی لے رہا ہے اسکا تعلق انتہائی غریب گھرانے سے بتایا جاتا ہے۔
About Author
