سکول ٹیچرز کے خلاف طالبات سے پاﺅں اور سردبانے کے علاوہ صفائی کروانے کی شکایت کیوں کی

بورے والا(چوہدری اصغر علی جاوید سے)سکول ٹیچرز کے خلاف طالبات سے پاﺅں اور سردبانے کے علاوہ صفائی کروانے کی شکایت کیوں کی،محکمہ تعلیم کے حکام کا انوکھا شاہی فرمان جاری، شکایت کرنے والی سکول ہیڈ مسٹریس معطل،ذمہ دار بااثر ٹیچرز کے خلاف کوئی کاروائی نہیں کی، ہیڈ مسٹریس پر میڈیا کو ویڈیو اور تصادیر فراہم کرنے کا الزام عائد کر دیا،محکمہ تعلیم سکول میں بااثر ٹیچرز کی اجارہ داری کے سامنے ڈھیر ہو گیا،ہیڈ مسٹریس کو قربانی کا بکرا بنا کر معاملہ صاف کر دیا،تفصیلات کے مطابق بورے والا کی نواحی آبادی مدینہ کالونی میں واقع گورنمنٹ ایم سی گرلز پرائمری سکول میں طالبات کو پڑھائی کی بجائے بااثر معلمات کی جانب سے پاﺅں دبانے، سرکو دبانے اور جھاڑو سے سکول کی باقاعدہ صفائی کروانے کا سلسلہ عرصہ دراز سے جاری تھا جس پر سکول کی ہیڈ مسٹریس نے انہیں روکا تو وہ اُسکے خلاف ہو گئیں اور اُسے انتظامی امور میں مفلوج کرکے رکھ دیا جس پر ہیڈ مسٹریس مس نعیمہ اختر نے اسکی تحریری شکایت محکمہ کے حکام کو کر دی جس میں دیگر ٹیچرز کے رویہ اور ڈیوٹی میں غفلت کے متعلقہ آگاہ کیا اس حوالہ سے میڈیا میں خبریں بھی نشر ہوئیں جس پر محکمہ کے حکام نے اپنی اس ناکامی اور محکمہ کی بدنامی پر پردہ ڈالنے کے لیے ذمہ دار ٹیچرز کے خلاف کاروائی کی بجائے شکایت کرنے والی ہیڈ مسٹریس کو قربانی کا بکرا بناتے ہوئے اُسے معطل کر دیا جبکہ اس غیر ذمہ دارانہ فرائض کی ادائیگی اور غفلت کی مرتکب بااثر ٹیچرز کی سکول میں اجارہ داری قائم رکھنے کے لیے اُنکے خلاف کوئی کاروائی نہ کی محکمہ کے اس شاہی فرمان سے متاثرہ ہیڈ مسٹریس کو ڈی ای او ایلیمنٹری زنانہ وہاڑی کو رپورٹ کرنے کی ہدایات جاری کر دی ہیں اور اُس پر دباﺅ ڈالا جا رہا ہے کہ وہ تحریری طور پر یہ لکھ کر دے کہ اُس نے میڈیا کو ویڈیو اور تصاویر فراہم کی ہیں نہ لکھ کر دینے کی صورت میں اُسے دور دراز علاقے میں ٹرانسفر کر دیا جائے محکمہ تعلیم کے افسران کی اس مضحکہ خیز کاروائی نے یہ ثابت کر دکھایا ہے کہ خادم اعلیٰ پنجاب کے”پڑھا لکھا پنجاب “کے ویژن کو ناکام کرنے میں کم چور اساتذہ اور محکمہ کے افسران ملوث ہیں مقامی سول سوسائٹی کے نمائندوں اور نمائندہ شہریوں نے وزیر اعلیٰ پنجاب اور سیکرٹری تعلیم سکولز سے اس واقعہ کا نوٹس لینے کا مطالبہ کیا ہے۔