ڈکیتی کی چھ مختلف وارداتیں،ڈاکووں نے تین لاکھ سے زائد نقدی اور قیمتی سامان لوٹ لیا

بورے والا(چوہدری اصغر علی جاوید سے)ڈکیتی کی وارداتوں میں افسوس ناک حد تک اضافہ ہو گیا،ڈکیتی کی چھ مختلف وارداتوں میں تین لاکھ سے زائد نقدی،موٹر سائیکل،لائسنسی اسلحہ اور لاکھوں روپے کے قیمتی موبائل لوٹ لئے گئے،شہریوں میں شدید خوف کی فضاء طاری ہو گئی،تفصیلات کے مطابق بورے والا سرکل میں ڈکیتی اور راہزنی کی وارداتوں میں غیر معمولی اضافہ نے شہریوں کے اوسان خطا کر دیئے،تھانہ گگومنڈی کی حدود مانا موڑ کے قریب واقع مقامی ہوٹل پر تین نامعلوم مسلح موٹر سائیکل سوار ڈاکووں نے ہوٹل کے مالک اور عملہ کو یرغمال بنا کر ایک لاکھ سے زائد نقدی،لائسنسی رائفل،دو موبائل فون اور نئی موٹر سائیکل لوٹ کر گگو منڈی میں واقع عبداللہ میڈیکل سٹور کے مالک سے گن پوائنٹ پر 20 ہزار نقدی اور موبائل فون چھین کر فرار ہو گئے،تھانہ ماڈل ٹاون کی حدود شہر کے مصروف ترین علاقہ ڈی بلاک میں دن دیہاڑے جدید اسلحہ سے لیس تین نامعلوم ڈاکو جاوید پینٹ ہاوس سے گن پوائنٹ پر 2 لاکھ سے زائد نقدی چھین کر رفو چکر ہو گئے،تھانہ صدر کی حدود 499 (ای بی) کے قریب مسلح ڈاکو نواحی گاوں 435 (ای بی) کے سہیل نامی شخص سے گن پوائنٹ پر ہزاروں روپے نقدی اور قیمتی موبائل چھین کر لے گئے،تھانہ صدر کی حدود 259 (ای بی) کے قریب نامعلوم مسلح موٹر سائیکل سوار 461 (ای بی) کے رزاق نامی شخص سے موبائل فون اور ہزاروں روپے نقدی لوٹ کر فرار ہو گئے،تھانہ صدر کی حدود میں ہی پی آئی لنک کے قریب 457 (ای بی) کے رہائشی افضال سے 25 ہزار نقدی اور موبائل فون چھین کر فرار ہو گئے ان پے در پے وارداتوں کی وجہ سے شہری شدید خوف میں مبتلا ہیں پولیس نے تاحال مقدمات درج نہیں کئے۔