عطائی ڈاکٹروں کا نیٹ ورک سرگرم،نواحی اڈوں پر نان کوالیفائیڈ عطائیوں نے موت گھر کھول لیے

بورے والا(چوہدری اصغر علی جاوید سے)محکمہ صحت کی مجرمانہ غفلت،عطائیوں کے مضبوط نیٹ ورک کے خلاف کاروائیاں نہ ہو سکیں،شہر اور نواحی اڈوں پر نان کوالیفائیڈ عطائیوں نے موت گھر کھول لیے،غریب اور سادہ لوح افراد کی زندگیوں سے کھیلنے کا مکروہ دھندہ کھلے عام جاری،کوالیفائیڈ ڈاکٹرز کے بورڈ لگا کر نان کوالیفائیڈ عملہ ڈلیوری اور دیگر آپریشن کرنے میں مصروف،ہیلتھ کیئر کمیشن کے قوانین کی دھجیاں اڑائی جانے لگیں،سیکرٹری صحت سے فوری نوٹس لینے کا مطالبہ،تفصیلات کے مطابق بورے والا شہر کی نواحی بستیوں اور مضافات میں محکمہ صحت کی مجرمانہ غفلت اور چشم پوشی کی وجہ سے عطائیوں کے مضبوط نیٹ ورک نے پنجے گاڑ لئے ہیں سرجیکل کلینک،سرجیکل ہسپتال اور مختلف ناموں سے دوکانوں میں کوالیفائیڈ ڈاکٹرز کے بورڈ لگا کر عوام کو بے وقوف بناتے ہوئے یہاں نان کوالیفائیڈ سٹاف کے ذریعے خواتین کے ڈلیوری آپریشن سمیت دیگر سرجریاں کی جانے لگی ہیں کم فیس کا لالچ دیکر یہ عطائی سادہ لوح اور غریب عوام میں جانوں سے کھیل رہے ہیں ان جعلی ڈاکٹرز کے بنائے گئے ہسپتالوں میں آپریشن تھیٹر سے لیکر کمروں تک صفائی کے بھی انتہائی ناقص انتظامات ہیں جبکہ ان ہسپتالوں کے ساتھ بنائے گئے میڈیکل سٹوروں پر نشہ آور ادویات کے علاوہ انتہائی غیر معیاری ادویات کی فروخت بھی انسانی زندگیوں سے کھیلنے کا گھناﺅنا جرم ہے اس تمام تر صورتحال میں مقامی نمائندہ شہری تنظیموں نے سیکرٹری ہیلتھ پنجاب اور ہیلتھ کیئر کمیشن کے ذمہ دار حکام سے مطالبہ کیا ہے کہ انسانی زندگیوں سے کھیلنے کے اس غیر قانونی کاروبار کے خلاف بلا تفریق آپریشن کر کے انکا خاتمہ کیا جائے۔