ٹی ایچ کیو ہسپتال میں پرائیویٹ ایمبولینسز کا راج،غریب افراد لٹنے پر مجبور

بورے والا(نمائندہ خصوصی)تحصیل ہیڈ کوارٹر ہسپتال میں پرائیویٹ ایمبولینسز کا راج،ہسپتال گیٹ پر قابض پرائیویٹ ایمبولینس مافیا وبال جان بن گیا،غریب لواحقین لٹنے پر مجبور،اعلیٰ حکام سے فوری نوٹس کا مطالبہ،تفصیلات کے مطابق تحصیل ہیڈ کوارٹر ہسپتال کے داخلی راستے میں پرائیویٹ ایمبولینسز کے مالکان نے قبضہ جما رکھا ہے ڈرائیورز 24 گھنٹے مرکزی راستوں کے ساتھ ساتھ راہداریوں اور مرکزی گیٹ کے قریب اپنی ایمبولینسز کھڑی کئے رکھتے ہیں اس غیر قانونی ایمبولینس سٹینڈ کی وجہ سے ہسپتال کے گیٹ کے سامنے ٹریفک کی روانی بری طرح متاثر ہو چکی ہے اور ہر وقت رش لگا رہتا ہے ان ایمبولینسز کھڑی رہنے سے پیدا شدہ بدترین ٹریفک جام کی وجہ سے ریسکیو 1122 کی ہنگامی صورتحال میں آنے والی ایمبولینسز کا راستہ رک جاتا ہے اور تشویشناک حالت میں آنیوالے مریضوں کی ایمرجنسی منتقلی میں رکاوٹ پیدا ہوتی ہے مزید یہ بات بھی سامنے آئی ہے کہ جیسے ہی کوئی مریض ہسپتال میں جاں بحق ہو جاتا ہے تو ایمبولینسز کے ڈرائیورز کا غول اُس میت کے غمزدہ لواحقین کو گھیر لیتا ہے اور ریٹ طے کئے بنا میت کی منتقلی کر لی جاتی ہے اور بعد میں منہ مانگے دام وصول کیے جاتے ہیں سرکاری ہسپتال میں ان لاچار اور غریب مریضوں کے ورثاء سے بھی 5 سے 10 کلو میٹر کے فاصلہ سے مریض ہسپتال لانے یا گھر چھوڑ کر آنے کیلئے یہ پرائیویٹ ایمبولینس ڈرائیورز 2 سے 3 ہزار روپے کی ڈیمانڈ کرتے ہیں اور من مرضی کا کرایہ وصول کرتے ہیں نمائندہ شہریوں حاجی محمد سرور،سلطان افضل،منشا مانگٹ،جمیل اختر،عابد ضیائ،شہباز احمد،سول سوسائٹی،نمائندہ شہری تنظیموں نے اے سی بورے والا،سی ای او ہیلتھ،ڈپٹی کمشنر وہاڑی اور سیکرٹری ہیلتھ پنجاب سے اس ایمبولینس مافیا کو ہسپتال کے گیٹ سے ہٹانے اور ان ڈرائیورز کو فی کلومیٹر کرایہ لینے کا پابند بنائے جانے اور کرایہ نامہ ہسپتال گیٹ پر نمایاں آویزاں کروانے کا مطالبہ کیا ہے۔