وہاڑی روڈ پر بس اور کوسٹر میں خوفناک تصادم،چار افراد جاں بحق جبکہ بیس سے زائد زخمی

بورے والا(چوہدری اصغر علی جاوید سے)وہاڑی روڈ پر مسافر بس اور کوسٹر میں خوفناک ٹریفک حادثہ،مسافر بس اور کوسٹر کے مابین تصادم کے نتیجہ میں دو بچوں اور ایک خاتون سمیت 4 افراد جان کی بازی ہار گئے جبکہ 20 مسافر زخمی ہو گئے،زخمیوں کو تحصیل ہیڈ کوارٹر ہسپتال منتقل کر دیا گیا،تفصیلات کے مطابق بورے والا سے ملتان جانے والی مسافر کوسٹر جب وہاڑی روڈ پر اڈا ظہیر نگر کے قریب پہنچی تو ملتان سے آنے والی تیز رفتار مسافر بس غلط اوور ٹیک کرتے ہوئے اس سے ٹکرا گئی جسکے نتیجہ میں کوسٹر میں سوار دو بچوں اور ایک خاتون سمیت چار افراد موقع پر ہی جاں بحق ہو گئے جبکہ کوسٹر میں سوار 15 مسافر اور بس میں سوار 5 مسافر زخمی ہو گئے جاں بحق ہونے والوں کی شناخت مجاہد حبیب سکنہ شاہ رکن عالم کالونی ملتان،ثقلین سکنہ عارف والا،نجمہ بی بی سکنہ عارف والا اور سعدیہ بی بی سکنہ شاہ رکن عالم کالونی ملتان کے نام سے ہوئی ہے واقعہ کی اطلاع ملتے ہی ریسکیو 1122 کی ٹیمیں جائے حادثہ پر پہنچ گئیں جنہوں نے 10 سے زائد معمولی زخمیوں کو ابتدائی طبی امداد کے بعد فارغ کر دیا دیگر زخمیوں اور نعشوں کو ٹی ایچ کیو ہسپتال بورے والا منتقل کر دیا گیا جہاں زخمیوں کو طبی امداد دی جا رہی ہے اسسٹنٹ کمشنر بورے والا عمر فاروق بھی اطلاع ملتے ہی ہسپتال پہنچ گئے اور زخمیوں کو بہتر طبی سہولتیں فراہم کرنے کی ہدایات جاری کیں انکا کہنا تھا کہ ان حادثات کی روک تھام کیلئے ٹھوس اقدامات کی ضرورت ہے جبکہ زخمیوں کے مطابق حادثہ تیز رفتاری کی وجہ سے بس کے ڈرائیور نے تیز رفتاری کی وجہ سے اوور ٹیکنگ کے دوران کوسٹر کو ٹکر مار دی جبکہ شہریوں کا کہنا ہے کہ آئے روز ٹریفک کے حادثات میں انسانی جانوں کا جو ضیاع ہوتا ہے اس میں ٹریفک پولیس کی مبینہ غفلت ہے جو ٹریفک قوانین پر عملدرآمد نہیں کرواتی۔