سرکاری ملازمین و افسران کو جانی و مالی نقصان پہنچانے کی ذمہ داری اراکین اسمبلی اور تاجروں پر عائد ہوگی۔میونسپل انتظامیہ

بورے والا(چوہدری اصغر علی جاوید سے)دوکانوں کی نیلامی کے خلاف تاجروں کے احتجاجی دھرنے پر میونسپل انتظامیہ نے موقف اختیار کیا ہے کہ میونسپل کارپوریشن کی جانب سے دوکانات کی نیلامی کے عمل میں رکاوٹ ڈالنے کیلئے (ن) لیگ کے ایم این اے چوہدری فقیر آرائیں،ایم پی اے سردار خالد محمود ڈوگر،ضلعی صدر انجمن تاجران محمد جمیل بھٹی،صدر انجمن تاجران وہاڑی ارشاد بھٹی،نائب صدر انجمن تاجران ضلع وہاڑی میاں ساجد آصف،جنرل سیکرٹری انجمن تاجران وہاڑی راﺅ خلیل احمد اور صدر انجمن تاجران عارف بازار محمد عاطف چوہدری کا تاجروں کو اشتعال دلوا کر میونسپل کارپوریشن کے دفاتر کا گھیراﺅ کرنا قابل مذمت،غیر قانونی اور کار سرکار میں مداخلت ہے بلدیہ کے دفاتر کی تالہ بندی،گھیراﺅ،سرکاری ملازمین کو جان سے مارنے کی دھمکیوں اور حبس بے جا میں رکھنے پر ملازمین میں شدید غم و غصہ پایا جا رہا ہے اس حوالہ سے ہم خبردار کرتے ہیں کہ کسی سرکاری ملازم و افسر اور سرکاری املاک کو جانی و مالی نقصان پہنچنے کی تمام تر ذمہ داری ایم این اے چوہدری فقیر آرائیں،ایم پی اے خالد محمود ڈوگر اور محمد جمیل بھٹی پر عائد ہو گی تاجروں کو اشتعال انگیزی اور غیر قانونی عمل دہشت گردی کے زمرے میں آتا ہے چند شر پسند عناصر اپنے ذاتی مالی مفاد کی خاطر بورے والا کا امن و امان کو خراب کرنا چاہتے ہیں میونسپل انتظامیہ نے بورے والا کی عوام سے اپیل کی ہے کہ ایسے شر پسند عناصر اور مفاد پرست لوگوں کا ساتھ مت دیں۔