سیف سٹی کیمروں کی تنصیب غلط فہمی کی وجہ سے تعطل کا شکار ہوئی۔احسان اللہ چوہان

بورے والا(چوہدری اصغر علی جاوید سے)ڈی پی او وہاڑی احسان اللہ چوہان نے کہا ہے کہ پولیس ہمیشہ عوام کی جان و مال کے تحفظ کی خاطر ڈیوٹی دیتے ہوئے اپنی خوشیاں بھی قربان کر دیتی ہے یہ سب کچھ کرنے کے باوجود پولیس کے بارے منفی رائے تبدیل نہیں ہوتی جس کی بڑی وجہ باہمی اعتماد کے فقدان کے علاوہ پولیس کو درپیش وسائل کی کمی سے پیدا ہونے والے مسائل کے بارے عوام کی لاعلمی ہے آبادی کے لحاظ ہمارے ضلع میں جرائم کی شرح 18 سے 21 فیصد ہے جبکہ سب سے زیادہ مقدمات لین دین کے متعلق ہیں جھوٹ پر مبنی مقدمات کے اندراج کیلئے عوام پولیس پر دباﺅ ڈالتی ہے بورے والا میں امن کمیٹی اور سول سوسائٹی کا کردار قابل ستائش ہے جرائم کے علاوہ جو بھی حادثات رونماء ہوتے ہیں اس میں سب سے پہلے پولیس پہنچتی ہے لیکن اسکے باوجود پولیس کو تنقید کا نشانہ بنایا جاتا ہے پولیس کم وسائل میں 24 گھنٹے ڈیوٹی دے کر عوام کی جان و مال کا تحفظ یقینی بناتی ہے بحیثیت معاشرہ ہم انسانی حقوق کی بات کرتے ہیں لیکن حقوق لیکر دینا ہم سب کی سب سے بڑی ذمہ داری بنتی ہے پولیس اور عوام کے مابین باہمی ہم آہنگی پیدا کرنے کی اشد ضرورت ہے جس میں عوام اور سول سوسائٹی کو چاہیے کہ وہ اپنی ذمہ داریوں کا ادراک کرتے ہوئے مسائل کے حل پر توجہ دیں ”سیف سٹی“ کیمروں کی تنصیب غلط فہمی کی وجہ سے تعطل کا شکار ہوئی لیکن ضلعی انتظامیہ سے ملکر انکی تنصیب جلد مکمل ہو گی ان کیمروں کی تنصیب سے جرائم میں خاطر خواہ کمی واقع ہوئی ہے یہ منصوبہ جرائم کے خاتمہ اور جرائم پیشہ افراد کی نشاندہی میں اہم کردار ادا کریں گے،ان خیالات کا اظہار انہوں نے تھانہ سٹی میں امن و امان کے قیام اور 12 ربیع الاول کے حوالہ سے انتظامات کے متعلق منعقدہ اجلاس سے خطاب کرتے ہوئے کیا اجلاس میں ڈی ایس پی شمس الدین خاں،تمام تھانوں کے ایس ایچ اوز،پی ٹی آئی جنوبی پنجاب کے جوائنٹ سیکرٹری ملک فاروق احمد اعوان،ضلعی صدر انجمن تاجران محمد جمیل بھٹی،صدر صرافہ ایسوسی ایشن شہزاد مصطفےٰ چوہان،چوہدری محمد عرفان گجر،مولانا عبدالحفیظ تبسم اور دیگر نمائندہ شخصیات بھی موجود تھیں نمائندہ شہریوں نے اپنے خطاب میں کہا کہ جرائم کے خاتمہ اور امن و امان کے قیام کیلئے تمام شہری پولیس کے شانہ بشانہ اپنا کردار ادا کرنے کیلئے ہمہ وقت تیار ہیں جرائم کے خاتمہ کیلئے ڈی ایس پی بورے والا کی قیادت میں پولیس نے بہترین اقدامات اٹھائے جرائم پیشہ افراد کی بیخ کنی کیلئے پولیس کی کاروائیاں قابل ستائش ہیں۔