بورے والا شہر تباہ حالی کا شکار،سیوریج کا نظام مفلوج،سڑکیں کھنڈر بن گئیں،وزیر اعلیٰ نوٹس لیں

بورے والا(چوہدری اصغر علی جاوید سے)”دی سٹی آف ایجوکیشن اینڈ سپورٹس“ تباہ حالی کا شکار،سڑکیں کھنڈر بن گئیں،سیوریج کا نظام بھی مفلوج،ضلعی حکام نے شہر سے منہ موڑ لیا،سیاسی و سماجی،مذہبی،کاروباری اور دیگر نمائندہ تنظیموں کا وزیر اعلیٰ سے فوری نوٹس لینے کا مطالبہ،تفصیلات کے مطابق ضلع صدر انجمن تاجران محمد جمیل بھٹی،صدر بار ایسوسی ایشن نوید احمد چیمہ،جنرل سیکرٹری کاشف مقبول جٹھول،انجمن شہریاں کے صدر محمد جاوید شاہین،انسانی حقوق کمیٹی کے صدر حاجی محمد رحمان کھوکھر،انجمن تاجران عارف بازار کے صدر محمد عاطف چوہدری،علماء کونسل کے نائب صدر حافظ ابوسفیان حنفی،امیر جماعت اسلامی عبدالوحید خالد،مسلم لیگ(ن) یوتھ ونگ کے ضلعی منظور برکت ماڑی والا اور دیگر نمائندہ شہریوں نے کہا ہے کہ پنجاب میں آبادی کے اعتبار سے 13 ویں بڑے شہر بورے والا میں گذشتہ دو سالوں سے تعمیر و مرمت کے کام نہ ہونے کی وجہ سے ”دی سٹی آف ایجوکیشن اینڈ سپورٹس“ مسائل کا گڑھ بن گیا ہے شہر کی تمام چھوٹی بڑی سڑکیں بری طرح تباہ ہو کر کھنڈر میں تبدیل ہو چکی ہیں جسکی وجہ سے نہ صرف آمدورفت میں مشکلات ہیں بلکہ ان سڑکوں پر سفر کرنے والی چھوٹی بڑی گاڑیاں کھٹارا بن گئی ہیں بارشوں کا پانی کئی کئی روز تک گہرے کھڈوں میں کھڑا رہتا ہے اسکے علاوہ 40/50 سالہ پرانا سیوریج سسٹم آبادی میں کئی گناہ اضافے اور میونسپل کارپوریشن میں وسائل کی کمی کی وجہ سے بری طرح مفلوج ہو چکا ہے جبکہ گزشتہ دور حکومت میں 22 کروڑ سے زائد کی لاگت سے بچھائی جانے والی نئی سیوریج لائنیں زمین بوس ہو چکی ہیں اور مکمل فنڈز جاری نہ ہونے سے یہ نامکمل منصوبہ سفید ہاتھی بن گیا ہے اس کے باوجود شہر کی بدترین صورتحال میں ضلع انتظامیہ نے بھی منہ پھیر کر اسے لاوارث چھوڑ دیا ہے انہوں نے وزیر اعلیٰ پنجاب سے صورتحال کا فوری نوٹس لینے اور اصلاح احوال کا مطالبہ کیا ہے۔