پانامہ فیصلے میں نواز شریف کی نااہلی کی مدت کا تعین واضع ہونا چاہئے ۔ علامہ ساجد نقوی

بورے والا(چوہدری اصغر علی جاوید سے)شیعہ علماء پاکستان سربراہ قائد ملت جعفریہ علامہ ساجد نقوی نے کہا ہے کہ آئین کی دفعات62،63 کو قائم رہنا چاہئے،پانامہ کے فیصلے میں سابق وزیر اعظم میاں نواز شریف کی نا اہلی کی مدت کا تعین بھی واضع کیا جانا چاہئے اس حوالہ سے کنفیوژن موجود ہے کسی بھی شخص کوتا حیات نا اہل کرنا زیادتی ہے اسکی نا اہلی کی مدت کا تعین کرکے اسے آئندہ کے لئے موقع ملنا چاہئے،عدلیہ کے فیصلوں کا احترام کرتے ہوئے ہمیں انہیں تسلیم کرنا ہو گا،امریکی صدر کا بیان قابل مذمت ہے امریکہ کو کسی بھی ملک کی خود مختاری میں دخل اندازی کا کوئی حق حاصل نہیں امریکہ ایک سامراجی قوت ہے اور وہ طاقت کے زور پر اپنے مذموم مقاصد کی تکمیل کے لئے دیگر ممالک پر اپنا تسلط قائم رکھنا چاہتا ہے لیکن اسے جان لینا چاہئے کہ پاکستان اسلامی دنیا کی ایٹمی قوت ہے اور ہم اپنے تحفظ کے لئے سر دھڑ کی بازی لگانے کو بھی تیار ہیں امریکی صدر کے بیان پر حکومت کو اپنی واضع اور دو ٹوک پالیسی اختیار کرنی چاہئے ان خیالات کا اظہار انہوں نے نواحی گاﺅں 505ای بی میں سینئر قانون دان چوہدری فدا حسین جان کی رہائش گاہ پر مختصر قیام کے دوران میڈیا سے گفتگو کرتے ہوئے کیا اس موقع پر علامہ نسیم عباس جوادی،علامہ غلام سجاد انیس،ڈاکٹر ادریس عباس جعفری،چوہدری نعیم رضا زرگر،سید رضا عباس زیدی،چوہدری اقبال حسین،چوہدری علی ذوالقرنین اور دیگر شخصیات بھی موجود تھیں علامہ ساجد نقوی نے کہا کہ موجودہ حکومت اپنی مقررہ مدت پوری کریگی اور انتخابات اپنے مقررہ وقت پر ہی ہونگے جس میں شیعہ علماء کونسل بھرپور حصہ لے گی اور متحدہ مجلس عمل کے پلیٹ فارم سے دینی جماعتوں سے ملکر الیکشن میں حصہ لینا ہماری ترجیح ہے۔