نواحی آبادی مدینہ کالونی میں بند واٹر سپلائی ٹیوب ویل چالو نہ ہو سکا،فوری نوٹس کا مطالبہ

بورے والا(چوہدری اصغر علی جاوید سے)نواحی آبادی میں چار ماہ قبل بند ہونے والا واٹر سپلائی ٹیوب ویل چالو نہ ہوسکا،علاقہ مکین ملحقہ علاقوں سے لائینوں میں آنے والا سیوریج ملا پانی پینے سے وبائی امراض کا شکار،شہری پیٹ کی بیماریوں،ہیپاٹائٹس اور دیگر امراض میں مبتلا،پانی کی شدید اور طویل قلت سے شہری قابل رحم تک پہنچ گئے،اعلیٰ حکام سے فوری نوٹس لینے کا مطالبہ،تفصیلات کے مطابق بورے والا کی سب سے گنجان آبادی مدینہ کالونی میں عرصہ چار ماہ قبل بند ہونے والا واٹر سپلائی ٹیوب ویل تاحال چالو نہ ہوسکا اور نہ ہی علاقہ مکینوں کو پینے کے پانی کی فراہمی یقینی بنائی جاسکی شدید گرمی کے مہینوں میں ٹیوب کی بندش سے ہزاروں افراد کو پینے کے پانی کی عدم فراہمی سے صورتحال انتہائی سنگین ہو گئی علاقہ مکین دیگر ملحقہ علاقوں سے ان پائپ لائینوں میں آنے والا بوند بوند پانی جس میں شکستہ پائپ لائینوں کے ذریعے سیوریج ملا پانی استعمال کرنے سے مقامی افراد پیٹ،ہیپاٹائٹس اور دیگر خطرناک بیماریوں کا شکار ہو چکے ہیں جبکہ پینے اور گھریلو استعمال کے پانی کی اس شدید قلت سے علاقہ مکینوں کی زندگیاں عذاب بن چکی ہیں روزانہ دور دراز علاقوں سے ضرورت کیلئے پانی لانا انتہائی دشوار ہو چکا ہے اس صورتحال پر میونسپل کارپوریشن کو متعدد بار یاد دہانی کے باوجود مسئلے کا کوئی حل نہیں نکالا جا سکا میونسپل کارپوریشن حکام کا کہنا ہے کہ ٹیوب ویل مکمل ناکارہ ہو چکا ہے اب نئے ٹیوب ویل کیلئے سیکرٹری لوکل گورنمنٹ سے نئے ٹیوب ویل کی منظوری کے بغیر فوری نیا ٹیوب ویل نصب کرنا ناممکن ہے علاقہ مکینوں نے ایڈیشنل چیف سیکرٹری جنوبی پنجاب،کمشنر ملتان ڈویژن اور ڈی سی وہاڑی سے فوری نوٹس لینے کا مطالبہ کیا ہے۔