بورے والا کو ضلع بناؤ تحریک زور و شور سے جاری،آئندہ ہفتے سیاسی و سماجی تنظیموں کا اجلاس طلب

بورے والا(چوہدری اصغر علی جاوید سے)بورے والا کو ضلع بناﺅ تحریک زور پکڑ گئی،وکلاء،سیاسی و سماجی،مذہبی،کاروباری اور دیگر نمائندہ تنظیموں کی طرف لائحہ عمل کا اعلان،آئندہ ہفتے بورے والا بار کی قیادت میں تمام تنظیموں کا مشترکہ اجلاس طلب کر لیا گیا،اجلاس میں احتجاجی دھرنے اور وزیر اعلیٰ سے ملاقات کی حتمی شکل دی جائے گی،تفصیلات کے مطابق بورے والا کو ضلع بناﺅ تحریک کے حوالہ سے پرنٹ،الیکٹرانک میڈیا اور سوشل میڈیا پر جاری مہم زور پکڑ چکی ہے جس میں بار ایسوسی ایشن بورے والا اہم کردار ادا کر رہی ہے اس تحریک کو نتیجہ خیز بنانے کے حوالہ سے آج بار ایسوسی ایشن کے صدر نوید احمد چیمہ،جنرل سیکرٹری کاشف مقبول جٹھول اور سول سوسائٹی کے نمائندوں کا ایک مشترکہ مشاورتی اجلاس منعقد ہوا جس میں فیصلہ کیا گیا کہ آئندہ ہفتے کے دوران بورے والا بار کی میزبانی میں تمام سیاسی جماعتوں کے اراکین اسمبلی،سابق ٹکٹ ہولڈرز،سول سوسائٹی نیٹ ورک،انجمن تاجران،انجمن آڑھتیاں غلہ منڈی،انجمن آڑھتیاں سبزی منڈی،پاکستان میڈیکل ایسوسی ایشن،پرائیویٹ سکولز ایسوسی ایشن،سپورٹس تنظیموں،سماجی تنظیموں اور دیگر تمام شعبہ ہائے زندگی کے نمائندہ افراد پر مشتمل ایک نمائندہ اجتماع منعقد کروایا جائے گا جس میں اس تحریک کو نتیجہ خیز بنانے کے حوالہ سے احتجاجی دھرنے اور ارکان اسمبلی کی وساطت سے وزیر اعلیٰ پنجاب سمیت دیگر حکومتی عہدیداران سے ملاقات کر کے تمام سٹیک ہولڈرز کی قرارداوں پر مشتمل ایک مشترکہ قرارداد پیش کی جائے گی یہ تحریک سیاسی وابستگیوں سے بالاتر ہو کر ایک مشترکہ جدوجہد کے طور پر کامیاب بنائی جائے گی۔