”پڑھوپنجاب بڑھو پنجاب“کے دعویٰ حقیقت نہ بن سکے،سکول میں پینے کا پانی دستیاب نہ ہونے سے بچے نہری کھال پر پانی پینے پر مجبور

بورے والا(چوہدری اصغر علی جاوید سے)”پڑھوپنجاب بڑھو پنجاب“کے دعویٰ حقیقت نہ بن سکے،نہ بلڈنگ،نہ چار دیواری اور نہ ہی پینے کے لیے پانی کا بندوبست،معصوم بچے سخت گرمی میں کھلے آسمان تلے زمین پر بیٹھ کر تعلیم حاصل کر رہے ہیں،سکول میں پینے کا پانی دستیاب نہ ہونے سے بچے نہری کھال پر پانی پینے پر مجبور،گاﺅں کے بااثر شخص نے سکول میں جانور باندھ لئے،تفصیلات کے مطابق بورے والا کے نواحی گاوں 136 ای بی میں ایک ایسا گورنمنٹ بوائز پرائمری سکول بھی موجود ہے جو عرصہ دارز سے بنیادی سہولیات سے محروم چلا آ رہا ہے سکول چاردیواری،کلاس رومز،واش رومز اور پینے کے لیے پانی جیسی سہولت سے بھی محروم ہے سکول کی چار دیواری عرصہ دراز قبل گرا دی گئی تھی جسکا ملبہ اور اینٹیں بھی لوگ اٹھا کر لے گئے آج تک مقامی نمائندوں کی عدم دلچسپی کی وجہ سے اس میں نہ ہی بچوں کے بیٹھنے کے لئے کوئی کلاس روم بن سکا نہ ہی اس سکول میں کوئی واش روم ہو اور نہ ہی کوئی سائی دار درخت جن کے نیچے بیٹھ کر گرمی کے موسم میں بچے پڑھ سکیں اس سکول کی حالت زار ابتر ہونے کی وجہ سے مقامی لوگ اپنے معصوم بچوں کو شہر اور قریبی دیہات کے سکولوں میں داخل کروانے پر موجود ہیں 600 سے زائد گھرانوں پر مشتمل اس گاوں کے اس وقت صرف 17بچے تعلیم حاصل کر رہے ہیں مقامی لوگوں کا کہنا ہے کہ انکا یہ سکول سیاسی مخالفت کی بھینٹ چڑھا ہوا ہے منتخب ارکان اسمبلی بھی نہیں چاہتے کہ یہ سکول چلے چاردیواری نہ ہونے کی وجہ سے گاوں کے بااثر شخص نے سکول کے احاطہ میں جانور باندھ رکھے ہیں سکول میں ایک ٹیچر تعینات ہے اور گزشتہ ماہ محکمہ تعلیم نے مزید دو خواتین ٹیچرز کی تعیناتی کر دی ہے جو ابھی تک سکول میں صرف اس لئے حاضر نہیں ہو سکیں کی چاردیواری نہ ہونے سے انہیں کوئی تحفظ نہیں سکول میں صرف 17 بچے زیر تعلیم ہیں کوئی درجہ چہارم ملازم بھی نہیں ایک ہی کمرہ سکول کا نظر آتا ہے جس میں سکول ٹیچر کی کرسی،بلیک بورڈ اور دیگر سامان وغیرہ رکھا ہوا ہے اہل علاقہ کا کہنا ہے کہ سکول میں مناسب سہولیات نہ ہونے کی وجہ سے وہ اپنے بچوں کو شہر یا ملحقہ دیہات کے سکولوں میں بھجوانے پہ مجبور ہیں جو طلبہ سکول آرہے ہیں وہ چھت نہ ہونے کی وجہ سے کھل آسمان تلے بیٹھ کر تعلیم حآصل کرنے پہ مجبور ہیں بار ہا دفعہ محکمہ تعلیم کے افسران کو سکول کی حالت زار کے بارے میں آگاہ کیا ہے لیکن انہوں نے اس پہ کوئی توجہ نہیں اہل دیہ نے کہا کہ اگر وزیر اعلی پنجاب اسے پڑھا لکھا پنجاب سمجھتے ہیں تو یہ ہمارے بچوں کے ساتھ ایک مذاق ہے انہوں نے سکول کی چاردیواری،واش رومز،کلاس رومز،بچوں کے لئے پینے کا صاف پانی اور دیگر سہولتوں کی فراہمی کا مطالبہ کیا ہے دریں اثناءڈپٹی ایجوکیشن آفیسر بورے والا رانا عبدالرحمان نے رابطہ کرنے پر بتایا کہ اس سکول کا عدالت میں کیس چل رہا ہے گاوں میں دو سیاسی پارٹیاں ہیں ایک سکول بننے کے حق میں ہے دوسری اسے ذاتی زمین سمجھ کر قبضہ کرنا چاہتی ہے محکمہ نے اسکی بلڈنگ کے لئے آٹھ لاکھ روپے مختص کئے تھے لیکن اس جھگڑے کی وجہ سے کسی نے بلڈنگ تعمیر نہیں ہونے دی اس سکول کا مسئلہ ڈی سی وہاڑی اور محکمہ کے اعلی حکام کے نوٹس میں ہے اہل دیہہ کا کہنا ہے کہ اسکا عدالت میں کیس خارج ہو چکا ہے اب محکمہ تعلیم،ضلعی انتظامیہ اور مقامی ارکان اسمبلی سکول بنانے میں دلچسپی نہیں لے رہے۔