شہر میں جنگل کا قانون،پولیس ڈاکوؤں کو پکڑنے میں ناکام،24 گھنٹوں میں دس وارداتیں

بورے والا(چوہدری اصغر علی جاوید سے)کورونا وائرس کی وجہ سے لاک ڈاﺅن کے دوران بورے والا میں ڈکیتی کی وارداتوں میں غیر معمولی اضافہ،ایک گھنٹے میں چھ جبکہ 24 گھنٹوں دس وارداتوں کے دوران شہری لاکھوں روپے نقدی اور قیمتی اشیاء سے محروم ہو گئے،شہر میں جنگل کا قانون،پولیس لاک ڈاﺅن پر عملدرآمد کروانے میں بھی ناکام،شہریوں کا آئی جی پنجاب سے فوری نوٹس لینے کا مطالبہ،تفصیلات کے مطابق ملک بھر کی طرح بورے والا میں بھی لاک ڈاﺅن جاری ہے لیکن اس لاک ڈاﺅن میں پولیس سڑکوں سے غائب اور غیر موثر گشت کی وجہ سے آئے روز ڈکیتی کی وارداتوں سے شہری چکرا کر رہ گئے ہیں گذشتہ 24 گھنٹوں کے دوران 10 سے زائد ڈکیتی کی وارداتوں اور ایک گھنٹہ کے دوران صرف تھانہ ماڈل ٹاﺅن کی حدود میں 6 ڈکیتیوں کے بعد شہر میں جنگل کا قانون بن چکا ہے ڈکیتی کی ان وارداتوں میں ماڈل ٹاﺅن کے رہائشی عثمان آرائیں سے پل نہر گﺅ شاہ پر دو مسلح موٹر سائیکل سوار 9 ہزار نقدی اور ایک موبائل،چونگی نمبر 5 پر محمد اسلام آرائیں سے 1500 روپے نقدی اور موبائل،ٹبہ مصطفی آباد کے رہائشی محمد رفیق اور اسکے ساتھیوں سے جو اپنی بیٹھک میں موجود تھے ان سے دو موبائل فون،گﺅ شالہ کے شفاقت نامی شہری سے گھر جاتے ہوئے 15 ہزار نقدی اور موبائل فون،کلیم اشرف سکنہ سیٹلائٹ ٹاﺅن سے 40 ہزار نقدی،251 (ای بی) کے ریاض احمد سے 2500 روپے نقدی اور موبائل فون،459 (ای بی) کے محمد مرتضی سے 1100 روپے نقدی اور موبائل فون،محمد اکرم سکنہ 459 ( ای بی) سے 800 روپے نقدی اور موبائل فون،محمد عمران سکنہ 459 (ای بی) سے 2 ہزار نقدی اور موبائل فون اور محمد نوید جٹ سے 1 ہزار روپے نقدی لوٹ لیئے ان پے در پے وارداتوں کے مقدمات بھی تاحال درج نہیں ہو سکے اور شہر میں پولیس کا گشت کہیں نظر نہیں آ رہا پولیس کورونا ڈیوٹی کا بہانہ بنا کر شہریوں کو ماموں بنانے میں مصروف ہے جبکہ وارداتوں کا یہ نہ تھمنے والا سلسلہ جاری ہے جس سے شہری جو کہ پہلے ہی کورونا کے خوف سے ذہنی کرب میں مبتلا ہیں جرائم پیشہ افراد کی ان غیر معمولی کاروائیوں نے ان کے دن کا سکون اور راتوں کی نیندیں حرام کر دی ہیں اس سنگین صورتحال پر مقامی شہریوں اور متاثرہ افراد نے آئی جی پنجاب سے فوری نوٹس لینے کا مطالبہ کیا ہے۔