ڈی پی او وہاڑی احسان اللہ چوہان کا مختلف احساس ایمرجنسی کیش پروگرام سنٹرز کا دورہ

بورے والا(چوہدری اصغر علی جاوید سے)ڈسٹرکٹ پولیس آفیسر وہاڑی احسان اللہ چوہان نے ضلع کے مختلف احساس ایمرجنسی کیش پروگرام سنٹرز کا دورہ کیا اور سیکورٹی و حفاظتی انتظامات کا جائزہ بھی لیا اور پولیس افسران و دیگر ملازمین کو ہدایات جاری کیں اور کہا کہ حفاظتی اقدامات کو بروئے کار لاتے ہوئے سیکورٹی فول پروف بنانے اور سنٹرز میں آنے والے افراد کو مناسب فاصلے پر بٹھاتے ہوئے ایس او پیز پر مکمل عملدرآمد کروائے اس موقع پر ڈی پی ایس سکول میں بنائے گئے احساس کفالت کیش تقسیم سنٹر پر رضا کارانہ فرائض انجام دینے والے پی ٹی آئی کے سینئر راہنماء چوہدری اعجاز اسلم،مقامی کارکن میاں محمد عثمان اور دیگر کارکنان بھی موجود تھے ڈی پی او وہاڑی احسان اللہ چوہان نے میڈیا سے گفتگو کرتے ہوئے کہا کہ وہاڑی پولیس جہاں کورونا وائرس کے خلاف جنگ میں فرنٹ لائن پر موجود ہے وہیں پر احساس ایمرجنسی کیش پروگرام سنٹرز،قرنطینہ سنٹرز،تبلیغی مراکز،عبادت گاہوں کی چیکنگ،لاک ڈاﺅن کے سلسلہ میں ناکہ بندی اور جرائم کی بیخ کنی سمیت مختلف مقامات پر ڈیوٹی کے فرائض سر انجام دے رہی ہے اور حکومتی احکامات و ہدایات پر عملدرآمد کروانے میں پیش پیش ہے پولیس اپنے فرائض سے ہر گز غافل نہیں ہماری اولین ترجیح ایک صحت مند پرامن معاشرے کا قیام ہے عوام الناس بھی ذمہ دار شہری ہونے کا ثبوت دیں اور حکومتی اقدامات اور ریاستی قوانین کی پاسداری کریں شہری کورونا کے پھیلاﺅ کے تدارک،لاک ڈاﺅن پر پابندی اور جرائم پیشہ عناصر کی بیخ کنی کیلئے اداروں کا بازو بنیں اس میں ہم سب کی بھلائی ہے۔