شہر بھر میں تجاوزات "کلین اینڈ گرین" پنجاب مہم کو منہ چڑانے لگیں،انتظامیہ غائب

بورے والا(چوہدری اصغر علی جاوید سے)لاری اڈہ سمیت شہر بھر میں تجاوزات،گندگی کے ڈھیر اور ٹوٹی سڑکیں کلین اینڈ گرین پنجاب مہم کو منہ چڑانے لگیں،تحصیل میونسپل کارپوریشن ایڈمنسٹریشن کے شہر کو خوبصورت بنانے کے تمام دعوے ٹھس ہو گئے،تفصیلات کے مطابق حکومت پنجاب کے ”کلین اینڈ گرین“ مہم کے تحت سابق انتظامیہ نے لاری اڈہ،گول چوک،ریشم گلی،کالج روڈ،عارف بازار،ریل بازار،ایچ بلاک لاہور روڈ،چیچہ وطنی روڈ اور وہاڑی روڈ سے تجاوزات کو ہٹا کر لاری اڈہ اور شہر کے دیگر بازاروں کو کھلا کیا تھا مگر انتظامیہ کی مبینہ ملی بھگت سے قبضہ مافیا سے واہگزار کروائی گئی لاری اڈہ سمیت دیگر بازاروں میں دوبارہ سے تجاوزات قائم کر دی گئی ہیں جس سے لاری اڈہ سے شہر میں داخل ہونے اور وہاں سے گزر کر جانے والوں کیلئے شدید دشواری کا سامنا کرنا پڑتا ہے شہر میں صفائی نہ ہونے کی وجہ سے جگہ جگہ گندگی کے ڈھیر نظر آتے ہیں سڑکوں کی مرمت نا ہونے سے شہر بھر کی سڑکیں ٹوٹ پھوٹ کا شکار ہیں جس سے بیماریاں پھوٹنے کے ساتھ ساتھ حادثات میں بھی اضافہ ہوا ہے ڈاکٹر محمد سرور،سابقہ کونسلرز راﺅ غفار علی،غلام مصطفےٰ بھٹی و دیگر شہری خواتین اور طلباء،نمازی حضرات شہر کی اس ابتر صورتحال پر شدید پریشان ہیں انہوں نے وزیر اعلیٰ پنجاب و چیف سیکرٹری سے اصلاح احوال کا مطالبہ کیا ہے جبکہ ڈپٹی کمشنر کیپٹن (ر) وقاص رشید نے کہا کہ وزیر اعلیٰ پنجاب سردار عثمان بزدار کی ہدایت پر شہر سے تجاوزات کے خاتمہ،شہر کو صاف ستھرا اور سڑکوں کی مرمت کیلئے تمام وسائل بروئے کار لائے جا رہے ہیں شہر میں تعمیر ہونے والی نئی عمارتوں اور مارکیٹوں کی تعمیر نقشہ کی منظوری کے بعد اجازت دی جائے گی اس سے مسائل میں کمی آئے گی۔