باراتیوں کی فائرنگ سے نوجوان کی ہلاکت کے دوسرا روز بھی شہر بھر میں سوگ کی فضا قائم رہی
بورے والا(چوہدری اصغر علی جاوید سے)باراتیوں کی فائرنگ سے نوجوان کی ہلاکت کے دوسرا روز بھی شہر بھر میں سوگ کی فضا قائم رہی،مرحوم کی نماز جنازہ ادا کر دی گئی،نماز جنازہ میں کسی بھی اہم سیاسی یا سرکاری شخصیت نے شرکت نہ کی،شہری حلقوں نے پولیس پر الزامات عائد کرتے ہوئے بتایا کہ نوجوان کی موت پولیس کی نا اہلی اورپیشہ وارانہ فرائض میں غفلت کا نتیجہ ہے،تفصیلات کے مطابق نواحی آبادی 435 ای بی کے غریب محنت کش علاقہ مکین محمد عابدکی باراتیوں کی طرف سے کی جانے والی فائرنگ سے موت واقع ہو گئی تھی جس کی نماز جنازہ ادا کر دی گئی نماز جنازہ میں شہر کی کسی بھی اہم سیاسی یا سرکاری شخصیت نے شرکت نہ کی مقتول کی والدہ کے مطابق اس کے بیٹے کی ایک سال پہلے شادی ہوئی تھی۔اور اس کی بیوہ بچے کی ماں بننے والی ہے۔اہل علاقہ نے بتایا کہ مقتول ایک آرے پر کام کر کے گھر کی کفالت کرتا تھا اور بوڑھی ماں نے مقتول کے والد کے انتقال کے بعد جس وقت مقتول کی عمر تین برس تھی لوگوں کے گھروں میں کام کر کے اسے پالا۔لوگوں نے مزید بتایا کہ اس شادی کی تقریب میں پچھلے تین دن سے ڈانس پارٹیوںآتش بازی اور شدید ہوائی فائرنگ کا سلسلہ جاری تھاجس کی آواز دور دور تک سنائی دیتی تھی بے حسی اور پولیس کی کارکردگی کا اندازہ اس امر سے لگایا جا سکتا ہے کہ پولیس کے جائے وقوعہ پر پہنچنے سے پہلے باراتی فائرنگ سے قتل کرنے کے بعد بارات لے کر دلہن کے گھر پہنچے۔ نکاح ہوا اور رخصتی کے بعد دلہن لے کر روانہ ہوئے۔ چند قدم پر واقعہ دلہن کے گھر جب پولیس کاروائی کے لیئے پہنچی تو اس وقت گھر والے روپوش ہو چکے تھے اور باہر باراتیوں کے کھانے والے برتن دھوئے جا رہے تھے۔دیگر شہریوں سول سوسائٹی اور مختلف مکتبہ فکر سے تعلق رکھنے والے لوگوں نے بھی واقعے کی شدید مزمت کی اور الزامات عائد کرتے ہوئے بتایا کہ شہر میں اکتوبر سے جاری شادیوں کے سلسلے میں شدید فائرنگ آتش بازی ناچ گانے کی محافل کی صورت آئی جی پنجاب کے آفس آرڈر اور نیشنل ایکشن پلان کی دھجیاں اڑائے جانے کا سلسلہ جاری ہے۔ضلعی ذمہ داران سے سوشل میڈیا اورقومی اخبارات کے ذریعے ایک کیمپین کی صورت مسلسل اپیل اور نوٹس لینے اور ملوث افراد کو گرفتار کرنے کی اپیلیں کی جاتی چلی آ رہی ہیں لیکن پولیس کی طرف سے عملی طورپر کوئی حکمت عملی اور قانون کی پاسداری پر عمل کروانے پر سنجیدگی نہیں دکھائی گئی جس کا شاخسانہ ایک نوجوان کی موت میں آج برداشت کرنا پڑا۔لوگوں نے الزام عائد کیا کہ یہ سب شادی کی محفلیں جن میں آتش بازی مجرے اور فائرنگ کی جاتی ہے دراصل پولیس کو اعتماد میں لے کر ہی کی جاتی ہیں۔ کوئی شہری15 پر کال نہیں کرتا کہ پولیس اس کو صیغہ راز میں نہیں رکھتی اور دشمنی پیدا ہو جانے کا ڈر پیدا ہو جاتا ہے اور کوئی کر بھی لے فوری تو کال ہی نہیں اٹھائی جاتی۔تمام حالات کے پس منظر میں آر پی او ملتان کے نوٹس لینے اور متعلقہ ایس ایچ او کو معطل کر کے ضلع بدر کرنے اور انکوائری کمیٹی بنا دینے کو ناکافی قرار دیااور آر پی او ملتان آئی جی پنجاب وزیراعلی پنجاب اور چیف جسٹس سے از خود نوٹس لینے کہ مطالبہ کیا کہ پولیس ماں کے لخت جگر چھن جانے پر ہی کیوں حرکت میں آ ئی اور انکوائری اور تفتیش کا دائرہ کار شہریوں کے پچھلے کچھ عرصوں کے دوران پولیس سے کی جا رہی اپیلوں کی روشنی میں آگے بڑھانے کا مطالبہ کیا۔
About Author
