محکمہ ماحولیات کی مجرمانہ غفلت سے فضائی آلودگی میں غیر معمولی اضافہ،شہری سراپا احتجاج

بورے والا(چوہدری اصغر علی جاوید سے)محکمہ ماحولیات کی مجرمانہ غفلت سے فضائی آلودگی میں غیر معمولی اضافہ،کوڑا کرکٹ اور فصلوں کی باقیات کو آگ لگانے والوں نے شہریوں کا سانس لینا بھی محال کر دیا،سموگ میں اضافہ سے سانس اور گلے کے امراض نے شہریوں کی زندگی اجیرن بنا دی،محکمہ ماحولیات کی چشم پوشی کے خلاف سول سوسائٹی اور دیگر نمائندوں شہریوں کا شدید احتجاج،تفصیلات کے مطابق حکومت کی جانب سے سموگ کے سدباب کے لیے کوڑا کرکٹ اور فصلوں کی باقیات کو آگ لگانے پر پابندی کے باوجود محکمہ ماحولیات اس پر عمل درآمد میں ناکام ہو چکا ہے محکمہ ماحولیات کے افسران اور عملہ فیلڈ میں اس قانون شکنی کے خلاف کاروائی کے لیے نظر نہیں آ رہا شہر اور گردونواح میں کوڑا کرکٹ کے بڑے ڈھیروں کو صبح اور شام کے وقت آگ لگا کر تلف کرنے کے اس غیر قانونی اقدام کی وجہ سے ماحولیاتی آلودگی میں بے پناہ اضافہ ہو چکا ہے اور شہریوں کا سانس لینا بھی دشوار کر دیا ہے اس زہریلی سموگ کی وجہ سے شہری سانس اور گلے کے امراض کا شکار ہو رہے ہیں محکمہ ماحولیات کی اس مجرمانہ غفلت اور چشم پوشی پر سول سوسائٹی کے ارکان سید سجاد حسین بخاری،عبدالرﺅف چوہدری،سید زاہد حسین مشہدی،محمد لطیف خلجی،میاں عدیل مختار،میاں محمد اشرف،عبدالمجیب پوسوال،محمد شیر خاں کھچی اور دیگر نمائندہ شہریوں نے ڈی سی وہاڑی سے فوری نوٹس لینے اور غفلت کے مرتکب افراد کے خلاف کاروائی کا مطالبہ کیا ہے۔