نااہل اور کرپٹ حکومت سیاسی مخالفین کے خلاف انتقام میں اندھی ہو چکی ہے۔رانا ثناء اللہ
بورے والا(چوہدری اصغر علی جاوید سے)پاکستان مسلم لیگ( ن ) پنجاب کے صوبائی صدر رانا ثناء اللہ نے کہا ہے کہ نااہل حکومت نے پہلے چینی،آٹا اور ادویات اسکینڈلز میں عوام سے اربوں روپیہ لوٹا اب ایک مرتبہ پھر پیٹرول مہنگا کر کے عوام کی زندگی عذاب بنا دی ہے،ان خیالات کا اظہار انہوں نے فیصل آباد میں اپنی رہائش گاہ پر معروف مسلم لیگی راہنماءچوہدری رضوان عابد آرائیں اور مسلم لیگ(ن) سٹی بورے والا کے سیکرٹری اطلاعات محمد اسلم جمال کی قیادت میں ایک نمائندہ وفد سے ملاقات کے دوران گفتگو کرتے ہوئے کیا رانا ثناء اللہ نے کہا کہ گذشتہ پونے تین سال سے ہر پندرہ روز بعد پیٹرول،بجلی،گیس سمیت مختلف اشیاء کی قیمتیں بڑھائی جا رہی ہیں جو بہت بڑا ظلم ہے 22 کروڑ عوام ظالم حکومت کو جھولیاں اٹھا کر بدعائیں دے رہے ہیں ہر طرف بدترین مہنگائی،بےروزگاری اور لاقانونیت کادور دورہ ہے احتساب کے نام پر سیاسی مخالفین کے گھر گرائے جا رہے ہیں جبکہ سب سے بڑے ڈاکو اور قبضہ مافیا وفاقی کابینہ کا حصہ ہیں نااہل حکومت سیاسی مخالفین کے خلاف انتقام میں اندھی ہو چکی ہے رانا ثناء اللہ نے کہا کہ اس حکومت کا خاتمہ قریب ہے اوپر سے لیکر نیچے تک ساری حکومت عوام کو ریلیف دینے کی بجائے بدزبانی اور بدتمیزی پر لگی ہوئی ہے متحدہ اپوزیشن مولانا فضل الرحمان کی قیادت میں متحد ہے اپوزیشن میں تقسیم کی جھوٹی باتیں کرنیوالے خود آپس میں دست و گریبان ہیں انہوں نے کہا کہ نیازی نیب گٹھ جوڑ زیادہ دیر نہیں چلے گا نیب کو احتساب کے نام پر کیے گئے تمام مظالم کا حساب دینا ہو گا دریں اثناء چوہدری رضوان عابد آرائیں نے رانا ثناء اللہ کی پارٹی خدمات کو خراج تحسین پیش کرتے ہوئے انہیں دورہ بورے والا کی دعوت دی جو انہوں نے قبول کرتے ہوئے جلد آنے کا وعدہ کیا۔
About Author
