بیوی کو مبینہ طور پر زہر دیکر موت کے گھاٹ اتارنے والے شوہر سے پولیس سازباز
بورے والا(چوہدری اصغر علی جاوید سے)بیوی کو مبینہ طور پر زہر دیکر ہلاک کرنے والا شوہر پولیس سے ساز باز کر کے رہا،مقدمہ کی تفتیش کیلئے تھانے جانے والے مقتولہ کے بھائیوں اور اہل محلہ کو ایس ایچ او تھانہ سٹی نے دھمکیاں اور گالیاں دیکر تھانے سے باہر نکال دیا،مقتولہ کے ورثاء انصاف کیلئے دربدر،ڈی ایس پی بورے والا نے مدعی کی درخواست پر ایس ایچ او کے خلاف انکوائری کا حکم دے دیا،تفصیلات کے مطابق نواحی آبادی وڑائچ ٹاﺅن کے رہائشی حساس ادارے کے(ر) اہلکار الطاف حسین کی جانب سے تھانہ سٹی میں درج کروائے گئے مقدمہ قتل میں موقف اختیار کیا گیا تھا کہ اسکی بہن شمیم بی بی کی شادی آٹھ ماہ قبل 445 (ای بی) کے محمد عثمان نامی شخص سے ہوئی شادی کے بعد وہ شمیم بی بی کو ذہنی اور جسمانی تشدد کا نشانہ بناتا رہا اور کاروبار کرنے کا بہانہ بنا کر اسکے والدین سے لاکھوں روپے کی خطیر رقم لیکر ہڑپ کر گیا اور مزید رقم لانے کیلئے دباﺅ ڈالتا تھا پہلی رقم کا حساب مانگنے پر اس نے دو ماہ قبل اسے گھر میں ہی زہر دے دیا جس سے اسکی حالت غیر ہونے پر اسے ہسپتال لایا گیا لیکن وہ جانبر نہ ہوسکی جس پر تھانہ سٹی میں دی گئی درخواست کی روشنی میں مقدمہ درج ہو گیا جس پر تھانہ سٹی پولیس نے ملزم عثمان کو گرفتار کر لیا اور تھانے میں شاہی پروٹوکول دیتے رہے درخواست گزار مقتولہ کے بھائی محمد الطاف نے میڈیا کو بتایا کہ ملزم کا بھائی چونکہ ایس ایچ او تھانہ سٹی کے بھائی کے شو روم پر کام کرتا ہے اور ایس ایچ او سے ساز باز ہو گیا ایس ایچ او نے بغیر تفتیش کے ملزم کو چھوڑ دیا اور گذشتہ روز ایس ایچ او نے مقدمہ کی تفتیش کیلئے تھانے بلوایا تو تھانے میں ملزم کو کرسی پر بٹھا کر ہمارے ساتھ جانے والے اہل محلہ و عزیز و اقارب کو کھڑا کئے رکھا جب ایس ایچ او سے ملزم چھوڑنے کے متعلق پوچھا تو وہ سیخ پا ہو گیا اور طیش میں آ کر مجھے اور ساتھ جانے والے افراد کو گالیاں دیکر تھانے سے باہر نکال دیا ایس ایچ او کی ملزم سے اس مبینہ ساز باز اور تھانے بلوا کر ہتک آمیز رویہ اختیار کرنے پر انچارج ڈی ایس پی فلک شیر بھٹی کو دی گئی درخواست پر انہوں نے انکوائری کا حکم دے دیا محمد الطاف نے میڈیا کے ذریعے آئی جی پنجاب سے مطالبہ کیا ہے کہ انکے مقدمہ کی تفتیش کسی ایماندار آفیسر سے کروائی جائے اور ہمیں تحفظ فراہم کیا جائے۔
About Author
